Akademik Musiqili Teatrın vep saytı yeniləndi

Azərbaycan Dövlət Akademik Musiqili Teatrının veb-saytı – https://musiqiliteatr.az// yenilənərək istifadəyə verilib.

Teatrın mətbuat xidmətindən LAF TV.az-a verilən məlumata görə, müasir dövrün tələblərinə cavab verən, son texnologiyaları dəstəkləyən yeni dizaynla tərtib olunan bu saytda teatrın yaranma və inkişaf tarixi, sənət ocağında çalışan yaradıcı və bədii-texniki heyətin tərkibi barədə ətraflı məlumatlar, o cümlədən teatrda həyata keçirilən müxtəlif layihələr haqqında geniş xəbərlər yer alıb.

Azərbaycan və ingilis dillərində fəaliyyət göstərən və bir neçə bölmədən ibarət olan saytda nümayişi nəzərdə tututlan tamaşaların aylıq repertuar cədvəli, proqramları və afişaları, həmçinin video və foto qalereyaları yerləşdirilib.

Saytı izləyən hər kəs teatr haqqında daha ətraflı və zəngin məlumatlar əldə edə və eyni zamanda tamaşa biletlərini onlayn sifariş verə bilər.

Qeyd edək ki, son 10 ildə teatrın direktoru, əməkdar incəsənət xadimi  Əliqismət Lalayevin rəhbərliyi ilə artıq 3-cü dəfədir ki, teatın saytı dövrün tələbinə uyğun şəkildə yenilənir.